500kms para recoller as súas equipacións de cowprint

Hai uns meses, en Casa Grande de Xanceda puxemos en marcha Futbolistas de la Leche, unha iniciativa coa que queriamos apoiar a dez equipos de fútbol feminino rural de municipios de menos de 15.000 habitantes. Porque o talento non entende de códigos postais e, aínda que moitas veces os focos apunten cara ás cidades, no rural tamén se xoga, se soña e se loita cada domingo por un balón.

Un deses equipos foi o Turégano Femenino C.F., un club segoviano que, en moi pouco tempo, conseguiu converterse nun auténtico orgullo para o seu pobo, o máis pequeno de Castela e León con equipo feminino. E esta semana as súas xogadoras achegáronse ata a nosa granxa para recoller as súas novas equipacións.

Iso si, antes de recibir as camisetas, tocaba unha visita obrigada pola granxa. As xogadoras percorreron as nosas instalacións, coñeceron de preto ás auténticas raíñas da casa —as vacas— e descubriron como traballamos cada día para elaborar os nosos iogures ecolóxicos. Dálle ao play e acompáñaas!

O noso xerente, o encargado da entrega

O momento máis esperado chegou cando Guillermo, o noso xerente, lles entregou persoalmente as novas camisetas de Futbolistas de la Leche. E, a verdade, gustáronnos todas, pero a negra de porteira conquistounos para sempre. Que pasada!

Do prado... ao campo

E, como non podía ser doutra maneira, a visita rematou con fútbol. As xogadoras do Turégano Femenino disputaron un amigable moi especial contra as nosas veciñas do Abellá SDC, o equipo que patrocinamos desde a pasada tempada e que inspirou o nacemento desta iniciativa. O encontro rematou cun 2-3, pero, sen dúbida, quen gañou foi o rural.

Porque, igual que nós cremos que hai outra maneira de producir alimentos, tamén cremos que hai outra forma de apoiar o deporte. Unha que empeza desde abaixo. Unha que empeza desde o barro. E, no noso caso, tamén desde o campo.

De cada tres persoas que abandonan o rural, dúas son mulleres en idade fértil. E nada nos gusta máis que apoiar alternativas de lecer como o fútbol, por iso estamos encantados de acompañalas neste camiño.

As do rural tamén xogan

Todo isto comezou en 2025, cando se nos ocorreu pensar que os balóns perdidos na Eurocopa feminina de Suíza podían acabar nos nosos prados. Así que chamamos ás xogadoras do Abellá SDC, que viñeron á granxa para disputar un partido do máis especial. Se nunca o viches, dálle ao play!