Burela xa ten o seu Paso de Vaca!

As cebras cáennos estupendamente. Pero, se hai un animal que leva séculos formando parte da nosa paisaxe, da nosa cultura e da nosa maneira de vivir, ese é a vaca. Por iso, esta semana, coincidindo coa Semana Europea da Mobilidade, inauguramos xunto ao Concello de Burela un novo Paso de Vaca, unha iniciativa coa que levamos anos enchendo Galicia de manchas de vaca. Cos Pasos de Vaca queremos render homenaxe ao rural, ás persoas que o traballan e, por suposto, ás vacas.

E, por suposto, había que celebralo como se merece. Así que cargamos as carretillas ata arriba e fomos ao Parque Rosalía de Castro, onde está o novo Paso de Vaca, con degustacións dos nosos produtos ecolóxicos e moOoitos agasallos para todas as persoas que se achegaron a visitarnos.

Con Burela xa son nove os concellos que contan cun Paso de Vaca: Arzúa, Mazaricos, Mesía, A Baña, Boimorto, Lugo, Santiago, Pontevedra... e agora tamén Burela. Vaia rabaño! 

E isto non acaba aquí. Se queres que o teu concello teña un Paso de Vaca, fai clic aquí e pídenolo. Igual a próxima vez que cruces a rúa... faino sobre manchas de vaca.