Nas cidades atopamos os típicos pasos de peóns como sinal internacional para marcar o cruzamento de peóns. Con respecto e agarimo a todas as cebras, pedimos que en todas as cidades, ou centros urbanos de Galicia teñan, polo menos, un PASO DE VACA en lugar do paso de peóns, é dicir un paso que en lugar das típicas raias de cebra teñan as manchas representativas das vacas leiteiras. 

- Por suposto, o paso de vaca pode traspasar as fronteiras galegas, e están chamados a esta iniciativa todas as cidades ou centros urbanos vinculados a comarcas leiteiras!


Ahora podes unirte ao movemento #PasoDeVaca firmando na petición que iniciamos en Change.org

10 boas razóns para que cada cidade galega teña o seu propio Paso de Vaca

1. Porque Galicia é o territorio que máis leite produce de toda España.
2. Porque as vacas forman parte da nosa cultura, da nosa tradición e da nosa paisaxe. Somos case tres millóns de galegos e case un millón de vacas!
3. Porque o rural galego sofre un gran despoboamento, e son sectores, como o leiteiro o que mantén vivas moitas das nosas aldeas.
4. Porque máis de 8400 familias dedícanse directamente á produción de leite en Galicia e podemos multiplicar por dous ou por tres os postos indirectos que xera.
5. Porque gran parte do rural de Galicia sobrevive é por obra e graza de todas as vacas e familias gandeiras galegas.
6. Porque a pesar das complicacións do sector lácteo e da súa, ás veces, difícil supervivencia, Galicia está no posto 10 nas áreas que máis leite producen de toda Europa.
7. Porque as cebras encántannos, pero non nos representan e as vacas Si nos representan.
8. Porque “a vaca é o símbolo da Paz”, segundo Castelao.
9. Porque os pasos de vaca pódense converter nun símbolo das nosas cidades, que os visitantes e turistas busquen para fotografarse e que sirva para contar un pouquiño da nosa historia e cultura, igual que o “ Ampelmann” en Berlín, o “banco máis bonito do mundo” en Ortigueira, ou o skyline de Nova York.
10. Porque cada vez que alguén cruce un paso de vacas e coñeza a súa historia, acordarase do rural e lembrará que consumir produtos de orixe próxima e a un prezo xusto axuda á supervivencia de miles de familias.

Por todas estas boas razóns demandamos un paso de vaca en cada cidade de Galicia ou centro urbano e, por suposto, tamén estendido a todas aquelas comunidades leiteiras que sentan identificadas.

Como exemplo temos a experiencia do PRIMEIRO PASO DE VACA DA HISTORIA no centro de A Coruña que foi cruzado por centos de persoas, e retransmitido por medios nacionais e internacionais. Igual que neste caso, por suposto entendemos que deba ser nunha zona segura, peatonal ou semipeatonal para que non supoña ningún problema para o tráfico e a seguridade.

Esta é unha iniciativa de Casa Grande de Xanceda para a revalorización do rural.

Máis sobre esta iniciativa de Paso De Vaca:
> Galicia ¡somos la leche!
> Inauguramos el primer Paso De Vaca de la Historia