O símbolo da muller máis grande do mundo segado na herba

• Mide 75m de longo e 35 metros de ancho, e converteuse nuns dos símbolos máis grandes da muller realizado nunha pradería
• O símbolo pretende reivindicar ás mulleres, especialmente ás do rural

Quixemos reivindicar ás mulleres segando nunha das nosas praderías o símbolo da muller máis grande do mundo feito en herba. Mide uns 75 metros de longo e 35 m de ancho e está situado en Xanceda, A Coruña.



Quixémonos sumar ás reivindicacións desta semana do 8 de marzo coa nosa versión rural:  “No rural é moi difícil encher rúas e prazas…  así que esta pareceunos unha forma moi visual e rechamante de facer esta reivindicación da muller, pero desde o rural”.
 

A igualdade no rural: doblemente difícil de alcanzar
Con motivo do 8 m, día internacional da muller, non só queremos reivindicar ás mulleres senón tamén lembrar que no rural a igualdade é aínda máis difícil alcanzala. Sobre todo, pola falta de servizos como garderías ou centros de día para maiores nas áreas rurais, este déficit de servizos é cuberto moitas veces polas mulleres, sacrificando o seu tempo persoal, a súa independencia ou o seu desenvolvemento profesional. Por iso apoiamos as peticións que demandan máis servizos para o rural como medida de igualdade, pero tamén, como fórmula de apoio a un rural cada vez máis  despoblado.

Na nosa granxa a maioría somos mulleres

Na nosa granxa ecolóxica empregamos a 45 persoas, das que o 60% somos mulleres. E non é a primeira vez que reivindicamos á muller, o pasado 15 de outubro convertimos unha das nosas cortes nun mural reivindicativo coa axuda dunha grafiteira local.