Máis pastoreo e menos postureo!

As nosas vacas son unhas raíñas e non unhas raíñas calquera, son unhas raíñas do pastoreo! Saen pacer 360 días ao ano e, ademais, dunha forma suúuper planificada. E é que, na granxa, practicamos o "pastoreo rotacional" en ecolóxico. E de que vai iso? Pois é unha técnica de manexo que consiste en levar ás nosas queridas ruminantes a parcelas de pasto diferentes para permitir que as áreas pastoreadas se recuperen antes de seren pastoreadas novamente. Soácheche isto de algo?


 

Seis motivos polos que é moi bo para a natureza

As vacas, co pastoreo rotacional, fan un gran traballo polo medioambiente. Contámoscho:

1. Captura de carbono: os pastizais ben xestionados actúan como sumidoiros de carbono. O crecemento continuo da vexetación aumenta a cantidade de carbono almacenado nela e no chan.

2. Mellora da saúde do chan: con este sistema o pasto e outras plantas recupéranse despois de seren pacidos e isto mellora a estrutura do chan porque as raíces das plantas medran máis fortes e fondas e, á súa vez, isto aumenta a capacidade do chan para reter auga e nutrintes.

3. Aumento da biodiversidade: o pastoreo rotacional beneficia a biodiversidade de plantas nos pastizais, xa que as vacas van movendo sementes dun prado a outro nas súas patas e fociño. Unha das nosas pradeiras contén máis de 30 especies vexetais distintas!

4. Menos erosión do chan: ao evitar o sobrepastoreo e permitir períodos de descanso para a vexetación, reducimos a erosión do chan. As plantas con raíces máis fortes e a cobertura vexetal axudan a manter o chan no seu lugar e a previr a súa perda pola acción do vento e da auga.

5. Mellor calidade da auga: ao reducir a erosión e mellorar a estrutura do chan, o pastoreo rotacional diminúe a escorrentía superficial e a contaminación da auga. O chan máis saudable pode filtrar mellor a auga, reducindo a cantidade de sedimentos e nutrientes que chegan aos corpos de auga. Ademais, en zonas moi húmidas, as pegadas das vacas contribúen a crear humidais!

6. Redución da compactación do chan: o movemento frecuente das nosas raíñas evita que pasen demasiado tempo nunha soa área, o que reduce a compactación do chan. Un chan menos compactado mellora a infiltración de auga e o crecemento das raíces das plantas.

7. Mellora no control de pragas e parasitos: ao rotar o gando, os ovos dos parasitos eclosionan fóra do alcance das nosas vacas. O pastoreo rotacional é un desparasitante natural!

E é que, as vacas pacendo non son o problema, son parte da solución!